ပြည်ထောင်စုလွှတ်တော် အထူးအစည်းအဝေးတွင် စစ်ကိုင်းတိုင်းဒေသကြီး၊ ကလေးမဲဆန္ဒနယ်၊ ပြည်သူ့ လွှတ်တော်ကိုယ်စားလှယ်ဒေါ်အေးအေးမူ (ခ) ဒေါ်ရှားမီး တင်သွင်းခဲ့သည့် အရေးကြီးအဆိုနှင့်စပ်လျဉ်း၍ မကွေးတိုင်းဒေသကြီး၊ ဆင်ပေါင်ဝဲမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးနေထက်ဝင်း၏ ဆွေးနွေးချက်

စိတ်အေးချမ်းသာစွာ အိပ်စက်အနားယူရမယ့်အချိန်တွေမှာ လေယာဉ်သံနားစွင့်နေကြရတဲ့ ဘဝတွေ၊ ကိုယ့်မိသားစု၊ ကိုယ့်ရပ်ရွာလေး ဘယ်အချိန် မီးအရှို့ခံခဲ့ရမလဲဆိုတဲ့ စိုးရိမ်ပူပန်မှုတွေနဲ့ နိစ္စဓူဝ ကျွန်တော်တို့ရဲ့ အပြစ်မဲ့ အရပ်သားပြည်သူတွေ ဖြတ်သန်းနေကြရပါပြီ။

မိမိတို့ ပြည်သူလူထုတစ်ရပ်လုံး၏ စည်းလုံးညီညွတ်မှုအင်အားကို ဖော်ညွှန်းပေးသည့် ယခု နွေဦးတော်လှန်ရေးသည် ကမ္ဘာ့နိုင်ငံများက ချီးကျူးအားကျလေးစားရမည့် သမိုင်းဝင်တော်လှန်ရေး ကြီး ဖြစ်မည်ဟု မိမိအနေဖြင့် အကြွင်းမဲ့ ယုံကြည်ပါတယ်။ အကြမ်းဖက် စစ်အာဏာရှင်စနစ်ဆိုး ကြီးအား နိုင်ငံမှ အပြီးတိုင် အမြစ်ပြတ် ဆိတ်သုဉ်းသွားစေရန် နည်းလမ်းအမျိုးမျိုးဖြင့် ပြည်သူများက အသက်ပေး၍ ကြိုးစားပါဝင် လုပ်ဆောင်နေမှုများအပေါ် ကုလသမဂ္ဂလုံခြုံရေးကောင်စီအပါအဝင် အာဆီယံအဖွဲ့ဝင်နိုင်ငံများနှင့် နိုင်ငံတကာအသိုက်အဝန်းအနေဖြင့် အသိအမှတ်ပြု လေးစားသော အားဖြင့် အကြမ်းဖက်စစ်အုပ်စုနှင့် ၎င်းတို့အား အားပေးကူညီနေသည့် အာဏာလက်ပါးစေများ အပေါ် ဥပဒေနည်းလမ်းအရ ထိထိရောက်ရောက် အရေးယူအပြစ်ပေးနိုင်ရေးနှင့် နှုတ်ဆိတ်နေခြင်း သည် မတရားမှုအား အားပေးရာရောက်သည်ကို သတိပြု၍ လူသားချင်းစာနာထောက်ထားမှု အကူအညီများအား ပြည်သူရွေးချယ်ထားသည့် တရားဝင် အမျိုးသားညီးညွတ်ရေးအစိုးရမှတစ်ဆင့် ပံ့ပိုးကူညီမှုများ လုပ်ဆောင်ပေးသွားရန် တောင်းဆိုတိုက်တွန်းလျက် ယခုအရေးကြီးအဆိုကို လေးလေးနက်နက် ထောက်ခံဆွေးနွေးလိုက်ရပါတယ်။

အရေးတော်ပုံ မုချအောင်ရမည်။