ပြည်ထောင်စုလွှတ်တော် အထူးအစည်းအဝေးတွင် စစ်ကိုင်းတိုင်းဒေသကြီး၊ ကလေးမဲဆန္ဒနယ်၊ ပြည်သူ့ လွှတ်တော်ကိုယ်စားလှယ် ဒေါ်အေးအေးမူ (ခ) ဒေါ်ရှားမီး တင်သွင်းခဲ့သည့် အရေးကြီးအဆို

လွှတ်တော်ကိုယ်စားလှယ်ဟောင်း ဦးဖြိုးဇေယျာသော်အပါအဝင် ဒီမိုကရေစီအရေး တက်ကြွလှုပ်ရှားသူ (၄) ဦးအား သေဒဏ်ပေးကွက်မျက်ခဲ့ပြီး ပြည်သူ (၁၀၀) ကျော်အပေါ်၌လည်း သေဒဏ်ချမှတ်ခံထားရပါတယ်။ ဖမ်းဆီးထိန်းသိမ်းခံထားရသူအချို့အား အစအနဖျောက်ထားပြီး မိသားစုဝင်များနှင့် အဆက်အသွယ် ဖြတ်တောက်ခြင်းခံထားရပါတယ်။ သေဒဏ်အမိန့်ချမှတ်ခံ ထားရသူများအပေါ် ကြိုးပေးကွက်မျက်မှု မပြုလုပ်နိုင်ရေး အချိန်မီ တားဆီးကာကွယ်ပေးရန် အရေးတကြီးလိုအပ်လျက်ရှိကြောင်း နိုင်ငံတကာခေါင်းဆောင်များကို ထပ်လောင်းအသိပေးလိုပါတယ်။

ယခုကဲ့သို့ အကြမ်းဖက်စစ်ကောင်စီက စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများအား ဆက်လက်တိုးမြှင့်လုပ်ဆောင်နေခြင်းသည် ပြစ်ဒဏ်မှ ကင်း လွတ်နေခြင်းနှင့် နိုင်ငံတကာ၏ အရေးယူဆောင်ရွက်မှုများ တိုးမြှင့်လုပ်ဆောင်ရန် လိုအပ်လျက် ရှိကြောင်း မီးမောင်းထိုးပြလျက်ရှိပါတယ်။

ဒီနေရာမှာ အာဆီယံအနေဖြင့် အဖွဲ့ဝင်နိုင်ငံတစ်နိုင်ငံဖြစ်သည့် မြန်မာနိုင်ငံ၏ အရေး ကို ဖြေရှင်းဆောင်ရွက်နိုင်ဖို့ ကြိုးပမ်းဆောင်ရွက်မှုတွေဟာ အနည်းငယ်မျှသာ တိုးတက်မှုရှိတယ် ဆိုတာ အသိပေးတင်ပြလိုပါတယ်။ ၂၀၂၀ ပြည့်နှစ်၊ အထွေထွေရွေးကောက်ပွဲမှတစ်ဆင့် ပြည်သူ လူထုက ဒီမိုကရေစီနည်းကျ ရွေးကောက်တင်မြှောက်ထားသည့် ရွေးကောက်ခံ လွှတ်တော် ကိုယ်စားလှယ်များအပါအဝင် အဓိကပါဝင်ပတ်သက်သူ ဒီမိုကရေစီအင်အားစုများနှင့် ထိတွေ့ ဆက်ဆံမှုအားနည်းခြင်းဟာ မြန်မာ့အရေးဖြေရှင်းနိုင်ရေး အာဆီယံရဲ့ ကြိုးပမ်းမှုများ မအောင်မြင် ခြင်းရဲ့ အဓိကအချက်လို့ သုံးသပ်ယူဆမိပါတယ်။ ဒါ့ကြောင့် လက်ရှိ အာဆီယံအလှည့်ကျ ဥက္ကဋ္ဌ အဖြစ် တာဝန်ထမ်းဆောင်နေသည့် အင်ဒိုနီးရှားအနေဖြင့် အားနည်းချက်များကို သုံးသပ်ကာ အဖွဲ့ဝင်နိုင်ငံများအကြား ပိုမိုစည်းလုံးညီညွတ်မှုဖြင့် မြန်မာ့အရေးကို အမြန်ဆုံး ကူညီဖြေရှင်းပေး နိုင်မယ်လို့ ယုံကြည်မျှော်လင့်ပါတယ်။

အကြမ်းဖက်စစ်ကောင်စီက ကျူးလွန်နေသည့် ရာဇဝတ်မှုတွေဟာ နိုင်ငံတကာ ဥပဒေ များနှင့် စံနှုန်းများကို ဖောက်ဖျက်နေရုံသာမက နိုင်ငံတကာတရားစီရင်ရေးနှင့် တရားဥပဒေ စိုးမိုး ရေးကို တိုက်ရိုက်ခြိမ်းခြောက်လျက်ရှိပါတယ်။ မြန်မာပြည်သူများသည် ဆိုးရွားသော လူ့အခွင့်အရေး ချိုးဖောက်မှုများအား နေ့စဉ်ခံစားနေရပြီး အပြည်ပြည်ဆိုင်ရာ လူ့အခွင့်အရေးကြေညာစာတမ်းပါ လူသားအခွင့်အရေးအားလုံး လုံးဝဆိတ်သုဉ်းခဲ့ပြီး ဖြစ်ပါတယ်။ ပဋိပက္ခကြောင့် နေရပ်စွန့်ခွာ ထွက်ပြေးနေရသည့် ပြည်သူ (၁၇.၆) သန်းကျော်ဟာ လူသားချင်းစာနာထောက်ထားမှုဆိုင်ရာ အကူအညီများ အရေးပေါ်လိုအပ်လျက်ရှိပါတယ်။ စစ်ဘေးရှောင်ပြည်သူများထံသို့ အရေးပေါ် အကူအညီများ တိုက်ရိုက်ရောက်ရှိနိုင်ရန်မှာ အမျိုးသားညီညွတ်ရေးအစိုးရ၊ တိုင်းရင်းသား တော်လှန်ရေးအဖွဲ့အစည်းများနှင့် မဖြစ်မနေ ပူးပေါင်းလုပ်ဆောင်သင့်ကြောင်းကိုလည်း ထပ်လောင်း အသိပေးလိုပါတယ်။

ကုလသမဂ္ဂလုံခြုံရေးကောင်စီအပါအဝင် နိုင်ငံတကာအသိုက်အဝန်းအနေနဲ့ အာဏာသိမ်း စစ်ကောင်စီက ကျူးလွန်လျက်ရှိသည့် ရာဇဝတ်မှုများ အမြန်ဆုံး အဆုံးသတ်နိုင်ရေး၊ နိုင်ငံတကာ ဥပဒေများနှင့်အညီ မြန်မာပြည်သူများကို ကာကွယ်ပေးရန် တာဝန်ရှိမှုကို ကမ္ဘာ့နိုင်ငံများအနေဖြင့် သိရှိ၍ ထိရောက်သော အရေးယူမှုများပြုလုပ်နိုင်ရန် အမြန်ဆုံး ပူးပေါင်းလုပ်ဆောင်ကြဖို့ မေတ္တာ ရပ်ခံအပ်ပါတယ်။ နိုင်ငံတကာအသိုက်အဝန်းအနေနဲ့ ဆက်လက်ပြီး တုံ့ဆိုင်းနေမယ်ဆိုရင် မြန်မာ ပြည်သူတွေရဲ့ အသက်ပေါင်းများစွာ ထပ်မံဆုံးရှုံးနေရဦးမှာ ဖြစ်ပါတယ်။ မြန်မာနိုင်ငံအတွက် အမှောင်မိုက်ဆုံး သမိုင်းတစ်ခုဖြစ်လာနိုင်သလို နိုင်ငံတကာအသိုက်အဝန်းအတွက် ရှက်ဖွယ် သမိုင်း တစ်ခုလည်း ဖြစ်လာနိုင်ပါတယ်။

ဒါ့ကြောင့် စစ်ကောင်စီက ကျူးလွန်လျက်ရှိသည့် စစ်ရာဇဝတ်မှုများနှင့် လူသားမျိုးနွယ် အပေါ် ကျူးလွန်လျက်ရှိသည့် ရာဇဝတ်မှုများ အမြန်ဆုံးရပ်တန့်နိုင်ရေး စစ်ကောင်စီထံ လေယာဉ်ဆီ အပါအဝင် စစ်လက်နက်များ၊ စစ်အသုံးအဆောင်ပစ္စည်းများ တင်ပို့ရောင်းချခြင်းအား ပိတ်ပင် တားဆီးမှုများကို ထိရောက်စွာ ပြုလုပ်ပေးဖို့ အင်မတန် အရေးကြီးလှပါတယ်။ အလားတူ လူမျိုး တုန်းသတ်ဖြတ်မှုများ၊ စစ်ရာဇဝတ်မှုများ၊ လူသားမျိုးနွယ်အပေါ် ကျူးလွန်သည့် ရာဇဝတ်မှုများ စစ်တပ်မှတာဝန်ရှိသူများ၊ တရားမဝင်စစ်ကောင်စီအဖွဲ့ဝင်များ၊ ၎င်းတို့၏ မိသားစုဝင်များ၊ ၎င်းတို့၏ စီးပွားရေးလုပ်ငန်းများ၊ ရာဇဝတ်မှုများကျူးလွန်ရာတွင် ပါဝင်ပတ်သက်သူများအပေါ် ထိရောက်ပြီး ပြင်းထန်သော ဒဏ်ခတ်အရေးယူပိတ်ဆို့မှုများ တိုးချဲ့ပြုလုပ်ပေးခြင်းအားဖြင့် ကူညီပေးကြဖို့ မေတ္တာရပ်ခံ တောင်းဆိုလိုပါတယ်။

မြန်မာနိုင်ငံတွင် စစ်ကောင်စီက ကျူးလွန်လျက်ရှိသည့် ရာဇဝတ်မှုများကို ဖော်ထုတ် နိုင်ရေး အချက်အလက်များ စုဆောင်းနေသည့် မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေး မှုယန္တရား (IIMM) ကို ပံ့ပိုးကူညီပေးပြီး နိုင်ငံတကာရာဇဝတ်ခုံရုံးနှင့် အပြည်ပြည်ဆိုင်ရာ တရားရုံး များသို့ ပေးပို့၍ တရားစီရင်နိုင်ရေးအတွက် ကမ္ဘာ့နိုင်ငံများက ပူးပေါင်းဆောင်ရွက်ပေးရန် တောင်းဆို လိုပါတယ်။ အရပ်သားပြည်သူများအပေါ် အကြမ်းဖက်စစ်တပ်က နေ့စဉ်တိုးမြှင့်လုပ်ဆောင်လျက် ရှိတဲ့ လူမဆန်တဲ့ အကြမ်းဖက်မှုများမှ မြန်မာပြည်သူများကို အကာအကွယ်ပေးနိုင်ရေးအတွက် လေယာဉ်မပျံသန်းရဇုံနှင့် R2P ဝင်ရောက်ပေးရန် ကုလသမဂ္ဂနှင့် အဖွဲ့ဝင်နိုင်ငံများအား တောင်းဆို လိုပါတယ်ရှင်။

ယနေ့ မြန်မာနိုင်ငံမှာ ဖြစ်ပေါ်နေတဲ့ ဆိုးရွားသောအခြေအနေတွေဟာ နိုင်ငံရေး သဘောထားမတိုက်ဆိုင်မှုကြောင့်မဟုတ်ဘဲ ရခိုင်ပြည်နယ်ရှိ ရိုဟင်ဂျာများအပေါ် လူမျိုးတုန်း သတ်ဖြတ်မှုနှင့် နိုင်ငံတကာရာဇဝတ်ခုံရုံး (ICJ) တွင် တရားရင်ဆိုင်နေရသည့် ရာဇဝတ်သား စစ်တပ်ခေါင်းဆောင်များက မြန်မာပြည်သူများအပေါ် ထပ်မံပြီး နိုင်ငံတကာ ရာဇဝတ်မှုတွေကို လူမဆန်စွာ ဆက်တိုက်ကျူးလွန်နေတာ လယ်ပြင်မှာဆင်သွားသလို ထင်ရှားပေါ်လွင်နေပါတယ်။ ဒါ့ကြောင့် အကြမ်းဖက်စစ်ကောင်စီက ကျူးလွန်လျက်ရှိသည့် စစ်ရာဇဝတ်မှုများနှင့် လူသားမျိုးနွယ် အပေါ် ကျူးလွန်လျက်ရှိသည့် ရာဇဝတ်မှုများ အမြန်ဆုံး အဆုံးသတ်နိုင်ရေး ကုလသမဂ္ဂလုံခြုံရေး ကောင်စီနှင့် နိုင်ငံတကာအသိုက်အဝန်းက ထိရောက်သော အရေးယူဆောင်ရွက်မှုများ ပြုလုပ်ပေး နိုင်ရေး ဒီကနေ့ အထူးအစည်းအဝေးကနေ ဆုံးဖြတ်ချက်ချမှတ်ပေးနိုင်ပါရန် လေးစားစွာ တင်ပြရင်း နိဂုံးချုပ်အပ်ပါတယ်ရှင်။

အားလုံးကို ကျေးဇူးတင်ပါတယ်ရှင်။