ပြည်ထောင်စုလွှတ်တော် သတ္တမအကြိမ်အစည်းအဝေး ဒုတိယနေ့တွင် ကချင်ပြည်နယ်၊ မဲဆန္ဒနယ်အမှတ် (၈) မှ အမျိုးသားလွှတ်တော်ကိုယ်စားလှယ် ဒေါ်ခင်နှင်းထွေး၏ မေးခွန်းအား အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ ဒုတိယဝန်ကြီး၊ နိုင်ကောင်းရွက်၏ ဖြေကြားချက်

လေးစားအပ်ပါသော ပြည်ထောင်စုလွှတ်တော် နာယကကြီးရှင့်။ နွေဦးတော်လှန်ရေးသည် စစ်အာဏာရှင်စနစ် ချုပ်ငြိမ်းရေး၊ ပြည်သူ့အခွင့်အရေး၊ လူ့အခွင့်အရေး၊ နိုင်ငံရေးစနစ် ပြုပြင်ပြောင်းလဲ ရေးတို့အတွက် လွန်စွာအရေးကြီးပါတယ်။ တော်လှန်ရေးအတွင်း ပါဝင်ဆောင်ရွက်ခဲ့ကြသည့် လူငယ်များ ၏ အနုပညာ၊ မိသားစုဘဝ၊ စီးပွားရေး၊ ပညာရေး၊ ကျန်းမာရေးတို့တွင် ထိခိုက်မှုများစွာ ဖြစ်ပေါ်ခဲ့ပြီး အချို့သော လူငယ်များအနေဖြင့် ကိုယ်အင်္ဂါများ ဆုံးရှုံးခဲ့ရပါတယ်။ မတရား အာဏာသိမ်း စစ်ကောင်စီ ပြုတ်ကျရေးအတွက် ခုခံတော်လှန်စစ်ပွဲများတွင် နိုင်ငံတဝှမ်းမှ လူငယ်များများစွာ ပါဝင်ဆင်နွှဲလျက် ရှိကြပါတယ်။ စစ်ရေးအရှိန်မြင့်လာသည်နှင့်အမျှ တိုက်ပွဲများ ပိုမိုပြင်းထန်လာပြီး ထိခိုက်မှုများလည်း ရှိခဲ့ပါတယ်။ လေးနှစ်ကျော်အကြာ ခုခံတွန်းလှန်စစ်တွင် အသက်ဆုံးရှုံးမှု၊ ကိုယ်အင်္ဂါ ဆုံးရှုံးမှုများတွင် လူငယ်များလည်း အများအပြား ပါဝင်လျက်ရှိပါတယ်။ စာသင်ခန်းအသီးသီးတွင် အသိပညာ၊ အတတ် ပညာများ ဆည်းပူးလေ့လာနေရမည့် တိုင်းပြည်၏ အညွန့်အဖူး လူငယ်လေးများသည် မိမိ၏ ဘဝကို စွန့်လွှတ်၍ ဖက်ဒရယ်ဒီမိုကရေစီအရေးအတွက် အားတက်သရော ပါဝင်ခဲ့သည့် လူငယ်များ ယခုကဲ့သို့ အသက်ခန္ဓာ၊ ကိုယ်အင်္ဂါများ စွန့်လွှတ်ဆုံးရှုံးခဲ့ရသည်မှာ တိုင်းပြည်အတွက်များစွာ ထိခိုက်နစ်နာရပြီး အလွန်ပင် ဝမ်းနည်းစရာ ကောင်းလှပါတယ်။ 

လေးစားအပ်ပါသော ပြည်ထောင်စုလွှတ်တော် နာယကကြီးရှင့်။ ကိုယ်အင်္ဂါများကို စွန့်လွှတ် ခဲ့ရသည့် လူငယ်များ၏ အခြေခံကျန်းမာရေးထောက်ပံ့မှု၊ ပညာရေးအခွင့်အရေး၊ စီးပွားရေးလုပ်ငန်းများ ပြန်လည်ထူထောင်ရန် အထောက်အကူဖြစ်စေသော အစီအစဉ်များ လိုအပ်ပါတယ်။ နွေဦးတော်လှန်ရေး အတွင်း ကိုယ်ကျိုးစီးပွားကို စွန့်လွှတ်၍ တာဝန်ထမ်းဆောင်ခဲ့သော လူငယ်များအတွက် အထောက်အပံ့ ကောင်းများ ရေရှည်ပံ့ပိုးဆောင်ရွက်ရန်လည်း တာဝန်ရှိရပါမယ်။ လူငယ်များ ကိုယ်အင်္ဂါဆုံးရှုံးမှုကြောင့် ပညာရေးအခွင့်အလမ်းများ ဆုံးရှုံးမှုမရှိစေရေး၊ အသက်မွေးဝမ်းကျောင်းနှင့် စီးပွားရေးလုပ်ငန်းများ လုပ်ကိုင်နိုင်ရန် အစီအမံများဆောင်ရွက်ခြင်း၊ အနာဂတ်တွင် လုံခြုံစိတ်ချစွာ နေထိုင်နိုင်ရေးတို့သည် လွန်စွာအရေးကြီးပါတယ်။ နွေဦးတော်လှန်ရေးအတွင်း ကိုယ်အင်္ဂါဆုံးရှုံးခဲ့ရသည့် လူငယ်များ၏ လူမှုရေး ပိုင်းဆိုင်ရာ၊ စီးပွားရေးပိုင်းဆိုင်ရာနှင့် ကျန်းမာရေးပိုင်းဆိုင်ရာ အခြေခံအခွင့်အရေးများကို သိရှိပြီး စီမံ ဆောင်ရွက်စေရန် တိုက်တွန်းခြင်းဖြစ်ပါတယ်။ ဒါ့အပြင် အနာဂတ်တွင် ငြိမ်းချမ်းစွာနေထိုင်နိုင်မည့် လူမှု အသိုက်အဝန်း တည်ဆောက်နိုင်ရန်နှင့် လူမှုရေးတည်ငြိမ်မှုအား ပိုမိုလုံခြုံစေရန် ရည်ရွယ်ပြီး တိုင်းပြည် အနာဂတ်အတွက် အနစ်နာခံခဲ့သည့် လူငယ်လေးများ၏ ဘဝအနာဂတ်အတွက်လည်း အစီအမံများ ရေးဆွဲ၍ ပြန်လည်ကုစားပေးခြင်း၊ ဂုဏ်ပြုချီးမြှင့်ပေးခြင်းများ ပြုလုပ်ပေးစေလိုပါတယ်။ 

သို့ဖြစ်ပါ၍ ကျွန်မအနေဖြင့် နွေဦးတော်လှန်ရေးအတွင်း ပါဝင်ပြီး ကိုယ်အင်္ဂါစွန့်လွှတ်ခဲ့ရသည့် လူငယ်များကိုယ်စား အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနအနေဖြင့် “နွေဦးတော်လှန် ရေးအတွင်း ကိုယ်အင်္ဂါစွန့်လွှတ်ခဲ့ရသည့် လူငယ်များအတွက် တော်လှန်ရေးကာလအလွန် အနာဂတ် ဘဝအာမခံချက်ရရှိနိုင်ရေး အစီအမံတစ်ရပ် ချမှတ်ရေးဆွဲထားခြင်း ရှိ၊ မရှိ” သိရှိလိုပါသဖြင့် ပြည်ထောင်စု လွှတ်တော် နာယကကြီးမှတစ်ဆင့် မေးခွန်းမေးမြန်းရခြင်းဖြစ်ပါတယ်ရှင့်။ အားလုံးကို ကျေးဇူးတင်ပါတယ်။

နိုင်ကောင်းရွက် (ဒုတိယဝန်ကြီး၊ ကာကွယ်ရေးဝန်ကြီးဌာန)။   သတ္တမအကြိမ် ပြည်ထောင်စု လွှတ်တော်အစည်းအဝေးတွင် ကြွရောက်လာကြသော ပြည်ထောင်စုလွှတ်တော် နာယကကြီးနှင့် ကိုယ်စားလှယ်များ၊ ကြည့်ရှုနေကြသည့် ပြည်သူများ မင်္ဂလာပါလို့ နှုတ်ခွန်းဆက်ပါတယ်။

လေးစားအပ်ပါသော ပြည်ထောင်စုလွှတ်တော် နာယကကြီးခင်ဗျာ။ ကျွန်တော်ကတော့ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ ပြည်ထောင်စုဒုတိယဝန်ကြီး နိုင်ကောင်းရွက် ဖြစ်ပါတယ်။ ကချင်ပြည်နယ်၊ မဲဆန္ဒနယ်အမှတ်(၈) အမျိုးသားလွှတ်တော်ကိုယ်စားလှယ် ဒေါ်ခင်နှင်းထွေး ၏ ကြယ်ပွင့်ပြမေးမြန်းချက်ကို မိမိအနေဖြင့် ရှင်းလင်းဖြေကြားသွားမှာဖြစ်ပါတယ်။

ဝန်ကြီးဌာနအနေဖြင့် အထက်ပါလုပ်ထုံးလုပ်နည်းအရ အတည်ပြုပြီး မသန်စွမ်းတပ်ဖွဲ့ဝင် များအတွက် တလုံးတခဲတည်း ဂုဏ်ပြုထောက်ပံ့ငွေ ကျပ် (၅) သိန်းနှင့် လစဉ်အလိုက် ဂုဏ်ပြု ထောက်ပံ့ ငွေ ကျပ် (၅) သောင်းတို့ကို ပံ့ပိုးလျက်ရှိပြီး ၂၀၂၄ ခုနှစ်၊ အောက်တိုဘာလအထိ အတည်ပြု တပ်ဖွဲ့ဝင် (၂၂၆) ဦးအတွက် ထောက်ပံ့ငွေ ခွဲဝေချထားပြီးဖြစ်ပြီး ၂၀၂၅ ခုနှစ်၊ ဇန်နဝါရီလအထိ မသန်စွမ်းတပ်ဖွဲ့ဝင် (၃၃၈) ဦးကို အတည်ပြုထားပြီး ဖြစ်ပါတယ်။ ကိုယ်အင်္ဂါချို့ယွင်းသည့် တပ်ဖွဲ့ဝင်များအတွက် ခြေတု လက်တုတပ်ဆင်ခြင်းကို ပြည်တွင်းနှင့်နယ်စပ်နေရာ (၁၁) ခုတို့တွင် MoD၊ MoH ပူးပေါင်း ဆောင်ရွက်မှု ဖြင့်လည်းကောင်း၊ ပြည်တွင်းပြည်ပအဖွဲ့အစည်းများဖြင့် ဆောင်ရွက်ကူညီခြင်းဖြင့်လည်းကောင်း ဆောင်ရွက်လျက်ရှိပါတယ်။