၂၀၂၆ ခုနှစ်၊ ဩဂုတ်လ ၂၈ ရက်
၁။ ယနေ့တွင် (၇၉)နှစ် ပြည့်မြောက်ခဲ့ပြီဖြစ်သော မွန်တော်လှန်ရေးနေ့အား ပြည်ထောင်စုလွှတ်တော်ကိုယ်စားပြုကော်မတီအနေဖြင့် ဝမ်းမြောက်စွာ ကြိုဆိုဂုဏ်ပြုအပ်ပါသည်။ မွန်တော်လှန်ရေးခေါင်းဆောင်များဖြစ်ကြသော နိုင်ပန်းသာ၊ နိုင်မောင်သိန်းတို့၏ ဦးဆောင်မှုနှင့် အတူ မွန်မျိုးချစ်လူငယ် (၂၇) ဦးတို့က “ခေတ်သစ် မွန်လက်နက်ကိုင်တပ်” ကို ဖွဲ့စည်းခဲ့ကြပြီး ၁၉၄၈ ခုနှစ်၊ ဇူလိုင်လ (၂၀) ရက်နေ့၊ နံနက် (၆း၃၀) (မြန်မာသက္ကရာဇ် ၁၃၁၀ ခုနှစ်၊ ဝါခေါင်လပြည့် နေ့) တွင် ဘားအံမြို့နယ်၊ ဇာသပြင်ကျေးရွာရှိ ရဲစခန်းအား စတင်တိုက်ခိုက် တော်လှန်ခဲ့သည့်နေ့ ကို မွန်တော်လှန်ရေးနေ့အဖြစ် နှစ်စဉ် ဂုဏ်ယူစွာ ကျင်းပခဲ့ကြပါသည်။
၂။ မွန်တိုင်းရင်းသားတို့သည် ကိုယ်ပိုင်အုပ်ချုပ်ခွင့်၊ ကိုယ်ပိုင်ပြဋ္ဌာန်းခွင့်နှင့် ကိုယ့်ကံကြမ္မာ ကိုယ်ဖန်တီးနိုင်ခွင့်နှင့် တန်းတူညီမျှခွင့်တို့ ဆုံးရှုံးခဲ့ကြရသည့်အတွက် အမျိုးသားအခွင့်အရေးများ အပြည့်အဝပြန်လည်ရရှိနိုင်ရေး၊ ဘိုးဘွားပိုင်နယ်မြေများအား ထိန်းသိမ်းကာကွယ်နိုင်ရေးနှင့် ဖက်ဒရယ်စနစ်ထူထောင်ရေး ရည်မှန်းချက်များအတွက် အစဉ်တစိုက် တိုက်ပွဲဝင်ခဲ့ကြပါသည်။ (၇၉) နှစ်တာ မွန်တော်လှန်ရေးသမိုင်းကြောင်းတွင် မြင့်မြတ်စွာ ပေးဆပ်၍ တိုက်ပွဲဝင်ကျဆုံးခဲ့ကြရသော မွန်တော်လှန်ရေးခေါင်းဆောင်ကြီးများနှင့်တကွ မွန်တိုင်းရင်းသားရဲဘော်ရဲဘက်များအား ဤသဝဏ်လွှာမှတစ်ဆင့် မိမိတို့အနေဖြင့် လေးနက်တည်ကြည်စွာ ဂုဏ်ပြုဦးညွှတ်အပ်ပါသည်။
၃။ လက်ရှိအခြေအနေတွင် အကြမ်းဖက်စစ်အုပ်စုသည် နိုင်ငံတဝှမ်းတွင် အကြမ်းဖက်လုပ်ရပ်များကို ဆက်လက်တိုးမြှင့်ကျူးလွန်လျက် တစ်ဖက်တွင်လည်း အကြမ်းဖက်အစိုးရအတုအား တရားဝင်မှုရရှိနိုင်ရန် အပြင်းအထန် ကြိုးစားအားထုတ်လျက်ရှိပါသည်။ ပြည်တွင်းပြည်ပ တော်လှန်ရေးအင်အားစုများအနေဖြင့်လည်း စစ်ရေးနှင့် နိုင်ငံရေးအခြေအနေများအား စဉ်ဆက်မပြတ် စောင့်ကြည့်သတိထားကာ စည်းလုံးညီညွတ်မှု၊ စုစည်းခိုင်မာမှုအင်အားဖြင့် ရည်မှန်းရာ ပန်းတိုင်ဆီသို့ ရောက်ရှိနိုင်ရန် ဆက်လက်ပူးပေါင်းဆောင်ရွက်ကြစေလိုကြောင်း တိုက်တွန်းလိုပါသည်။
၄။ ပြည်ထောင်စုလွှတ်တော်ကိုယ်စားပြုကော်မတီအနေဖြင့်လည်း ပြည်သူတို့၏ တရားဝင် လွှတ်တော်တစ်ရပ်အဖြစ် ခိုင်ခိုင်မာမာဆက်လက်ရပ်တည်လျက် မွန်တိုင်းရင်းသားတော်လှန်ရေးအင်အားစုများနှင့်သာမက အခြားသော ညီနောင်တိုင်းရင်းသားတော်လှန်ရေးအင်အားစုများနှင့်အတူ တော်လှန်ရေးတာဝန်များအား ပိုမိုပူးပေါင်းဆောင်ရွက်သွားမည်ဖြစ်ပါကြောင်း နိုင်ငံရေးသစ္စာဖြင့် ဤသဝဏ်လွှာအား ထုတ်ပြန်အပ်ပါသည်။
ပြည်ထောင်စုလွှတ်တော်ကိုယ်စားပြုကော်မတီ
