ပညာရေးကဏ္ဍနှင့်စပ်လျဥ်း၍ ပညာရေးကော်မတီသည် သြစတေးလျပညာရှင် Professor Joseph Lo Bianco၊ သြစတေးလျ ပါလီမန်အမတ် Janelle Saffin တို့နှင့် တွေ့ဆုံဆွေးနွေး

ပညာရေးကော်မတီသည် ပညာရေးကဏ္ဍနှင့်စပ်လျဥ်း၍ ပညာရှင်များနှင့် တွေ့ဆုံဆွေးနွေးခြင်း အစီအစဥ်အား ၂၀၂၂ ခုနှစ်၊ ဒီဇင်ဘာလ ၁၉ ရက်နေ့၊ ညနေ(၁၅:၀၀) နာရီတွင် ဗီဒီယို ကွန်ဖရင့်မှတစ်ဆင့် ပြုလုပ်ခဲ့သည်။

တွေ့ဆုံဆွေးနွေးပွဲ၌  ပညာရေးကော်မတီဥက္ကဋ္ဌ ဦးရောဘတ်ညေးရယ် က တွေ့ဆုံရခြင်း ရည်ရွယ်ချက်အား ရှင်းလင်းပြောကြား၍ CRPH ၏ အကြံပေး ကျွမ်းကျင်သူ Ms. Janelle Saffin (သြစတေးလျ ပါလီမန်အမတ်)က ပညာရေးကဏ္ဍအတွက် လိုအပ်သော လုပ်ငန်းစဥ်များအား ပိုမိုချိတ်ဆက်လုပ်ဆောင်နိုင်ရန်နှင့် တိုင်းရင်းသားလူမျိုးများ လက်ခံထားသည့် ဖက်ဒရယ်နိုင်ငံတစ်ခု တည်ဆောက်ရာတွင်  လူမျိုးစုအားလုံး တန်းတူညီမျှစွာ ပါဝင်နိုင်ရေးအတွက် ထည့်သွင်းစဥ်းစားပေးနိုင်မည့် ပညာရေးစနစ်တစ်ခု လိုအပ်ကြောင်း  ပြောကြားခဲ့သည်။ ဆက်လက်၍ ကော်မတီအတွင်းရေးမှူး ဒေါ်ကြည်ကြည်အုန်း က Professor Joseph Lo Bianco ၏ ကိုယ်ရေးအကျဥ်းအား ဖတ်ကြားခဲ့ကာ သြစတေးလျပညာရှင် Professor Joseph Lo Bianco က ကြားကာလပညာရေးတွင် လိုအပ်သည့် ပညာရေးမူဝါဒများ၊ ကော်မတီအနေဖြင့် အနာဂတ်တွင် အကောင်အထည်ဖော်လုပ်ဆောင်နိုင်သော ပညာရေး ဆိုင်ရာလုပ်ငန်းများအား ဆွေးနွေးမျှဝေခဲ့ပြီး တက်ရောက်လာသည့် ကော်မတီအဖွဲ့ဝင်များက သိလိုသည်များ ဆွေးနွေးမေးမြန်း၍ ဆွေးနွေးပွဲအား (၁၆:၄၀) နာရီတွင် ရုပ်သိမ်းခဲ့သည်။

ယခုဆွေးနွေးပွဲသည် တိုင်းရင်းသားလူမျိုးပေါင်းစုံ၏ ဘာသာစကားအရေးပါမှုများနှင့် မြန်မာနိုင်ငံ ကဲ့သို့ လူမှုရပ်ဝန်းတစ်ခုတွင်ရှိသင့်သည့် ဘာသာစကားနှင့်သက်ဆိုင်သည့် မူဝါဒများအား သိရှိနိုင်ရန် ရည်ရွယ်၍ ပြုလုပ်ခြင်းဖြစ်သည်။

ဆွေးနွေးပွဲသို့ ပညာရေးကော်မတီဥက္ကဋ္ဌ ဦးရောဘတ်ညေးရယ်နှင့် အဖွဲ့ဝင်များ တက်ရောက်ခဲ့ကြသည်။

ပြည်ထောင်စုလွှတ်တော်ကိုယ်စားပြုကော်မတီ