IPU တာဝန်ရှိသူများနှင့် CRPH သတင်းနှင့် ပြန်ကြားရေးကော်မတီ၊ နိုင်ငံတကာဆက်ဆံရေးကော်မတီ တို့သည် ၂၀၂၂ ခုနှစ်၊ ဇူလိုင်လ ၂၇ ရက်နေ့၊ မွန်းလွဲ ၁:၃၀ အချိန်တွင် ဗီဒီယိုကွန့်ဖရင့်ဖြင့် တွေ့ဆုံ၍ CRPH ၏ ပြင်ပဆက်ဆံရေးကဏ္ဍ နှင့်ဆက်သွယ်ရေးနည်းပညာကဏ္ဍတို့ အပေါ် ဆက်လက်ပူးပေါင်းဆောင်ရွက်နိုင်ရေး ဆွေးနွေးခဲ့ကြသည်။
အစည်းအဝေး၌ သတင်းနှင့် ပြန်ကြားရေးကော်မတီ ဥက္ကဌ ဒေါက်တာ ဝေဖြိုးအောင်၊ နိုင်ငံတကာဆက်ဆံရေးကော်မတီ ဥက္ကဌ ဒေါ်မြတ်သီတာထွန်းနှင့် အတွင်းရေးမှူး ဦးတင်ကိုကိုဦး၊ IPU မှ တာဝန်ရှိသူများနှင့် အကူအညီပေးရေး အစီအစဉ်တွင် ပါဝင်မည့် ကျွမ်းကျင်သူများ တက်ရောက်ခဲ့ကြသည်။
IPU နှင့် မြန်မာလွှတ်တော်တို့အကြား သဘောတူညီထားသည့်အကူအညီပေးရေးစီမံကိန်းအရ CRPH ၏ လုပ်ငန်းများ အားကောင်းလာစေရန် နိုင်ငံတကာ/သံတမန်ဆက်ဆံရေး၊ နည်းပညာကဏ္ဍတို့ အပါအဝင် နိုင်ငံတကာအသိုက်အဝန်းနှင့် လက်တွေ့ကျသော ပူးပေါင်းချိတ်ဆက်ဆောင်ရွက်မှုတို့ ပိုမိုဆောင်ရွက်နိုင်ရေး ပံ့ပိုးကူညီသွားမည် ဖြစ်ပါသည်။
ပြည်ထောင်စုလွှတ်တော်ကိုယ်စားပြုကော်မတီ
