ရက်စွဲ။ ။ ၂၀၂၂ ခုနှစ် ဇန်နဝါရီလ ၁၀ ရက်
ပြည်ထောင်စုလွှတ်တော်ကိုယ်စားပြုကော်မတီ (CRPH) နှင့် ကိုရီးယားနိုင်ငံ လွှတ်တော်ကိုယ်စားလှယ်များ တွေ့ဆုံပွဲကို ၂၀၂၂ ခုနှစ်၊ ဇန်နဝါရီလ ၁၀ ရက်နေ့၌ Virtual Conference ဖြင့် ပြုလုပ်ခဲ့ရာ ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့်၊ အတွင်းရေးမှူးအဖွဲ့ဝင် ဦးထွန်းမြင့်၊ အဖွဲ့ဝင်များ ဖြစ်ကြသည့် ဦးဇေလတ်၊ ဦးရောဘတ်ညေးရယ်၊ ဦးမျိုးနိုင်၊ နိုင်ငံတကာဆက်ဆံရေးကော်မတီ ဥက္ကဋ္ဌ ဒေါ်မြတ်သီတာထွန်းနှင့် နိုင်ငံတကာဆက်ဆံရေးကော်မတီဝင်များ၊ တောင်ကိုရီးယားနိုင်ငံဆိုင်ရာ မြန်မာကိုယ်စားလှယ်ရုံးမှ ကိုရီးယားသမ္မတနိုင်ငံဆိုင်ရာ NUG အစိုးရ၏ကိုယ်စားလှယ် ဦးရန်နိုင်ထွန်း၊ အကြံပေး ပါမောက္ခ ဘာ့အွန်းဟို၊ ရုံးအဖွဲ့မှူး ဦးစိုးမိုးသူ၊ အလုပ်သမားရေးရာကိုယ်စားလှယ် ဦးမျိုးဟိန်းနှင့် စကားပြန် ဒေါက်တာလေးလေးမွန်တို့ တက်ရောက်ခဲ့ကြသည်။
ယင်းတွေ့ဆုံပွဲသို့ တောင်ကိုရီးယားလွှတ်တော်ကိုယ်စားလှယ်များ ဖြစ်သည့် အာဏာရ ဒီမိုကရက်ပါတီမှ Mr. Ko Youngin (고영인) နှင့် Mr. Park Young-soon (박영순)၊
Platform Party (더불어시민당) မှလွှတ်တော်အမတ် Mr. Yang Jeong-sook (양정숙)၊တစ်သီးပုဂ္ဂလလွှတ်တော်အမတ် Ms. Yoon Mee-hyang (윤미향) ၊ Basic Income Party မှ Ms. Yong Hye-in (용혜인) နှင့် သမ္မတလောင်းအဖြစ် ဝင်ရောက်ယှက်ပြိုင်မည့် Mr. Oh Jun-ho(오준호) တို့နှင့်အတူ သတင်းမီဒီယာသမားများ တက်ရောက်ခဲ့ကြသည်။
ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌက အမှာစကားပြောကြားရာတွင် “ကိုရီးယားနိုင်ငံ သမ္မတ၊ လွှတ်တော်ကိုယ်စားလှယ်များနှင့် ကိုရီးယားပြည်သူများအား မြန်မာပြည်သူများနှင့် ရပ်တည်ပေးမှုများအတွက် များစွာ ကျေးဇူးတင်ပါကြောင်း၊ မြန်မာပြည်သူများနှင့် အတူရပ်တည်ရပ်တည်ကြောင်း ပြသခြင်းတွင် ပြည်သူများက ရွေးချယ်ထားသည့် အစိုးရနှင့် အတူရပ်တည်ပြီး ပူးပေါင်းဆောင်ရွက်မှုများ ပြုလုပ်ရန် လိုအပ်ပါကြောင်း၊ အမျိုးသားညီညွတ်ရေးအစိုးရအား တရားဝင်အစိုးရအဖြစ် အသိအမှတ်ပြုပေးပြီး စီးပွားရေးပူးပေါင်းဆောင်ရွက်မှု၊ ရင်းနှီးမြှုပ်နှံမှုနှင့် လူသားချင်းစာနာထောက်ထားမှုဆိုင်ရာ အကူအညီများ ပေးအပ်မှုများ ပူးပေါင်းဆောင်ရွက်ရေး၊ NUG သည် တရားဝင်အစိုးရအဖြစ် အကောင်အထည်ဖော်ဆောင်ရွက်မည့် စီမံကိန်းများ ရေးဆွဲထားသည့်အတွက် စီးပွားရေးစီမံကိန်းများအတွက် စာချုပ်ချုပ်နိုင်ရေး၊ CDM လှုပ်ရှားမှုတွင် ပါဝင်ခဲ့သည့် အစိုးရဝန်ထမ်းများ၊ ဖမ်းဆီးခံထားရသည့် မိသားစုဝင်များနှင့် စစ်ဘေးရှောင် ပြည်သူများအတွက် လူသားချင်းစာနာထောက်ထားမှုဆိုင်ရာ အကူအညီများ ပေးအပ်နိုင်ရေးတို့အတွက် အကူအညီများ ပေးအပ်နိုင်ရေး နှင့် စစ်အာဏာရှင်များ သက်ဆိုးမရှည်စေရန် ၎င်းတို့နှင့် စီးပွားရေး ပူးပေါင်းဆောင်ရွက်မှုများကို ရပ်တန့်ရေး ကိုရီးယားနိုင်ငံအစိုးရအား တိုက်တွန်းပေးရန် တောင်းဆိုလိုပါကြောင်း” ဖြင့် ပြောကြားခဲ့သည်။
အစည်းအဝေးတွင် “ကိုရီးယားနိုင်ငံဘက် စီးပွားရေးပူးပေါင်းဆောင်ရွက်မှုများ၊ COVID-19 ရောဂါထိန်းချုပ်ကာကွယ်ရေးနှင့် စီးပွားရေးဆိုင်ရာ ကိစ္စရပ်များအတွက် ချေးငွေ ရရှိနိုင်ရေး၊ စစ်ဘေးဒဏ်သင့် မြို့ရွာများနှင့် စစ်ဘေးရှောင်ပြည်သူများအတွက် လိုအပ်သည့် အကူအညီများ ပေးအပ်ရေး ကိစ္စများ၊ ကယားပြည်နယ်၌ ဖြစ်ပွားနေသည့် စစ်ပွဲများတွင် လက်နက်ကြီးများနှင့် လေကြောင်းများဖြင့် တိုက်ခိုက်နေခြင်းကြောင့် မြို့ရွာများ ပျက်စီးနေမှုနှင့် စစ်ဘေးရှောင်ပြည်သူများအတွက် လူသားချင်းစာနာထောက်ထားမှုဆိုင်ရာ အကူအညီများ ပေးအပ်နိုင်ရေး၊ ဖမ်းဆီးခံလွှတ်တော်ကိုယ်စားလှယ်များနှင့် ပြည်သူအားလုံးအတွက် ကမ္ဘာတဝှမ်းက ကျယ်ကျယ်ပြန့်ပြန့်သိရှိနိုင်ရေး၊ အကြမ်းဖက် စစ်ကောင်စီတပ်များက နိုင်ငံတစ်ဝှမ်း၌ ထိုးစစ်ဆင်နေမှုများနှင့် ကျူးလွန်နေသည့် အကြမ်းဖက်လုပ်ရပ်များ၊ ကိုရီးယားနိုင်ငံ သမ္မတ၊ လွှတ်တော်ကိုယ်စားလှယ်များနှင့် ပြည်သူများက မြန်မာအရေးအပေါ် ဆောင်ရွက်ခဲ့သည့် အခြေအနေများ၊ အကူအညီပေးခဲ့မှုများနှင့် ရှေ့ဆက်လုပ်ဆောင်ပေးမည့် အခြေအနေများ၊ မြန်မာနိုင်ငံ၌ ဒီမိုကရေစီပြည်လည်ရရှိရေး ပူးပေါင်းဆောင်ရွက်နိုင်မည့် အခြေအနေများ” ဆွေးနွေးခဲ့ကြသည်။
The Committee Representing Pyidaungsu Hluttaw
