၂၀၂၀ ပြည့်နှစ်၊ အထွေထွေရွေးကောက်ပွဲတွင် ပြည်သူလူထုက ရွေးချယ်တင်မြှောက်ခဲ့သည့် လွှတ်တော်ကိုယ်စားလှယ် (၂၉၈) ဦးသည် ၂၀၂၁ ခုနှစ်၊ ဖေဖော်ဝါရီလ ၅ ရက်နေ့တွင် တတိယအကြိမ်လွှတ်တော်၏ ပထမဆုံး အရေးပေါ်လွှတ်တော်အစည်းအဝေးတစ်ရပ်ကို ဗီဒီယိုကွန့်ဖရင့်မှတစ်ဆင့် ကျင်းပခဲ့ပါသည်။

ယင်းအစည်းအဝေးတွင် စစ်တပ်မှ အာဏာသိမ်းမှုကြောင့် ပုံမှန်လွှတ်တော်လုပ်ငန်းများ ဆောင်ရွက်နိုင်ရန် အခြေအနေမရှိခြင်းကြောင့် ပြည်ထောင်စုလွှတ်တော်၏ ဥပဒေပြုလုပ်ငန်းများကို ဆောင်ရွက်နိုင်ရန် “ပြည်ထောင်စုလွှတ်တော်ကိုယ်စားပြုကော်မတီ” အား လွှတ်တော်ကိုယ်စားလှယ် ၁၅ ဦးဖြင့် စတင်ဖွဲ့စည်း တာဝန်ပေးအပ်ခဲ့သည်။

အဆိုပါ အစည်းအဝေးသည် ပြည်သူ့လွှတ်တော်နှင့် အမျိုးသားလွှတ်တော်နှစ်ရပ်စလုံးမှ လွှတ်တော်ကိုယ်စားလှယ်စုစုပေါင်း၏ ၆၃% တက်ရောက်ခဲ့ကြသည့်အတွက် အစည်းအဝေး အထမြောက်ခဲ့သည်။ အစည်းအဝေးသို့ မတက်ရောက်နိုင်ခဲ့ကြသည့် အခြားသော လွှတ်တော် ကိုယ်စားလှယ် (၁၀၀) ဦး ခန့်မှ CRPH ဖွဲ့စည်းမှုနှင့် ကိုယ်စားလှယ်များခန့်အပ်တာဝန်ပေးမှုကို သဘောတူ ထောက်ခံကြောင်း လက်မှတ်ရေးထိုး၍ ပေးပို့ခဲ့ကြသည်။ 

အဆိုပါလွှတ်တော်အစည်းအဝေးသည် CRPH အား ပြည်သူလူထု၏ ထောက်ခံမှုနှင့်အတူ ဥပဒေပြုရေး၊ စောင့်ကြည့်ထိန်းကျောင်းရေးနှင့် ကိုယ်စားပြုရေးလုပ်ငန်းတာဝန်များကို ဆောင်ရွက်ရန်၊ နိုင်ငံတကာလွှတ်တော်အဖွဲ့အစည်းများနှင့် ဆက်ဆံရေးခိုင်မာစေရေး ဆက်သွယ် ဆောင်ရွက်ရန် ခွင့်ပြုခဲ့သည်။